Polaroid Taseralimmi torrallaavoq
Isiginnaartitsissut Polaroid ippassaq marlunngornermi naammassimmat, isiginnaariat ersaattaannerat uninngitsuungajappoq, minutsit 55-it misigisaqarfioqisut qaangiunneranni Taseraliup inersuani ulikkaarluinnarsimasumi.
“ Isiginnaartitsinissat annertuut aallartilerneranni pissangasoqartuaannarpoq, Taseralimmi pisortaq Juaaka Lyberth, oqarpoq.
- “Ataasinngormat Nuummi silarlussuallarmat timmisartullu unerarlutik, ajorluinnartumik kinguneqarnissaa ernummassutigileraluarparput. Qujanartumilli silaqqissivoq isiginnaartitsisussallu, minnerunngitsumillu teknikkerit isiginnaartitsivissamik, qullernik nipimillu ikkussuisussat, tikissinnaalerlutik. Kinguaattoorneqaraluartoq tamarmi ajunngitsumik inerneqarpoq.
- Nuannernerpaavorlu isiginnaartitsisartut torrallaallutik takutitsimmata isiginnaariallu nuannisarujussuarlutik. Isiginnaariat aallaqqaataanilli peqataalluaqaat. Alutornaqaat qitittut pinnersut pikkorissullu takullugit, oqaatsit qiimasut, nipit erinnallu tusarnersut tusarlugit, qulliit qaamarngullu pinnguarneri torrallatamik takullugit. Nuanneqaaq isiginnaartullu misigissussaat tamarmik attorneqarput. Qujanaq”.
Polaroid Jo Strømgren kompagni-p suliaraa takutinneqarneralu NAPA-p Taseraliup ammarneqarneranut tunissutigalugu. Taamaasilluni Polaroid-imik isiginnaartitseqatigiit qaammatini 2½-ini nunani assigiinngitsuni angalasussat torrallaalluinnarlutik Taseralimmi aallartipput.
Taseralimmi isiginnaartitsissutissaq tulleq tassa Pipaluk K. Jørgensen-ip isiginnaangassiaa Malugisarpara, septemberimi pisussaq, taannalu qilanaarineqalereerpoq
Taseralik info
Pingasunngorneq 20. august, 2008