Oktoberimi Taseralimmit nutaarsiassat PDF
Oktoberi pissanganartunik nuannersunillu kulturikkut misigisassanik neqeroorfippas-suaqassaaq.
- Taseralimmi isiginaartitsinerit
Macbeth, Shakespeare-p allataa
Tuluup isiginnaagassiortartorsuup William Shakespearip pissanganartuliaa Macbeth Silamiunit isiginnaartitsissutigineqartoq Taseralimmiissaaq oktoberip 7-anni. Nunatta isiginnaartitsisartuisa nuiamanersaat Makka Kleist inuttaassalluni.
Alianartuliatut pissanganartutut Shakespeare-p isiginnaagassiarisartagaanut allanut naleqqiullugu Macbeth-imi Shakespeare inuup tarnimigut pissusaanut pulalluinnarsimavoq. Sakkutuut naalagarsuat iluatsitsilluinnarsimasoq naalagaarusunnersuarmut ataqqisaarusunnersuarmullu ussernartorsior-titaangaarluni killormorluinnaq saappoq, nuliaminit immisulli piummartutigisumit itsarsuarlu ilisiitsumik siulittuisartumit kaammattorneqartuarluni. Naak oqaluttuaq 1040-mit 1047-imut pisimasuusaartin-neqaraluartoq, ullutsinni Macbeth-imut assingusorpassuarnik inoqarpoq.
Kalaallisut oqaatsivut oqaluinnarluni torrallatat atorlugit itsarnitsat paasiuminartunngorlugit Makka Kleist-ip isiginnaagassiaq takutissavaa, Shakespeare-ip isiginnaagassiaqqaavata anersaava atatiinnarlugu oqaluttuariaatsikkut qullilersuinikkullu. Iserneq 80,- kr., utoqqalinersialinnut aamma ilinniartunut 50,- kr. 7.oktober, nal. 19.30.
Malugisarpara Pipaluup allataa
Silaannakkut angallannikkut akunnattoorneq peqqutaalluni Malugisarpara Taseralimmi takutinneqanngitsoorpoq. Tamanna uagut isiginnaartitsisussallu assut ajuusaarutigaarput. Maannali nutaamik isumaqatigiissuteqarpugut, Malugisarparalu takutinneqartussanngorpoq oktoberip 18-ani aamma 19-ani. Sumiiffinni tamani Malugisarparap takutinneqarfiini isiginnaagassiaq nuannarineqarluinnarpoq. Isiginnaagassiortuuvoq Pipaluk Kreutzmann Jørgensen, 2001-03-mi Nørrebro teaterskole-mi atuarsimasoq. Taamanili takorluulersimavaa isiginnaartitsissummik kalaallisuumik allannissani, kulturikkut kingornutatsinnik ersarissaasumik. Isiginnaagassiamik ilisarititsinermini Pipaluk allappoq, isiginnaagassiami siunertarigini inuusuttut nammineq naleqassutsimik kalaaliussutsiminillu tulluusimaarutiginninnissaannik tunerusukkini. Malugisarpara nipilersukkat atorlugit pissanganartuliaavoq, inuusuttut marluk naapeqqaarnerannik oqaluttuarinnittoq, aamma imminnut qanilliniarlutik aqqusaartariaqagaannik. Isiginnaartitsisartut ( ilinniarsimasuunngitsut) arfinillit peqataapput. Aggo Rosing Olsen, Connie Kristoffersen, Vilhelm Egede, Najattaajaraq Joelsen, Ane Marie Ottosen aamma Miki Thomsen. Pipaluup allataraa ilitsersuisuuffigalugulu. Isiginnaariartussallu qilanaarfigisinnaavaat isiginnaagassiaq nipilersornermik, assilisanik, filminik isiginnaartitsinermillu imaqarluartoq. Isiginnaagassiaq inuusuttunut suliaavoq – tassa meeqqanoortuunngilaq – taamaattumik isiginnaariarsinnaasut ukiuat 12-nut killilerneqarsimavoq. Pissanganassaqaaq 18. aamma 19. oktober, nal. 20.00. Iserneq 60,- kr.
- Eqqumiitsuliat Taseralimmi
Kunngi – Timitalikkat
Eqqumiitsuliortoq aamma taalliortutut erinarsuusiortartutullu naluneqanngilluartoq kunngi, Frederik Kristensen, nammineq suliaminik saqqummersitsissaaq Taseralimmi 17. oktoberimiit. Kunngi eqqumiitsuliortutut tamatigoortutut ilisarisimaneqarpoq qalipakkanik, pappiaqqanik qiortakkanik ukkusissanillu qiperukkanik suliaqartartutut.
Taseralimmilu saqqummersitassai akryl atorlugu qalipagaapput qulequtsersimasai ”Timitalikkat”. Eqqumiitsuliortoq nammineq oqaluttuarpoq akryl atorlugu qalipaagaangami suleriaatsit assigiinngitsut marluk atortarini, tassa qalipakkat ilusaat ilisarnartut, imaluunniit ilisarnanngitsut, saqqummersitassanilu suleriaatsit taakku marluk iluiniissasut.
”Ilusaat ilisarnartunik qalipaagaangama qalipaatit killilimmik amerlassusillit atortarpakka, ilisarnanngitsunilli qalipaagangama killeqanngitsumik qalipaasersuisinnaasarpunga, imminut assut kiffaanngissuseqartillunga”.
- Ullutsinni suut tamarmi sukkaqisumik ingerlaarlutik sanioqquavaatigut, isigisavullu sivisulaartumik aalajagiussimasinnaasanngilavut. Taamaattumik pisariaqarpoq qalipakkanik itisileriffigisinnaasatsinnik misissuataarsinnaasat-sinnillu isiginnaagassaqarsinnaanerput, tassami tassangaannaq qalipakkami takusaqalersinnaagatta amerlasuuneq assigiinngitsorpassuarnik, kunngi oqaluttuarpoq.
Saqqummersitsinissamut atatillugu Taseraliup suliaritippai postkortit ataaseq 10,- kr-lerlugu pisiarineqarsinnaasut, aamma plakati 50,- kr. Saqqummersitat tuniniagaapputtaaq.
Kunngi - Timitalikkat, 17. oktober – 9.november.
- Nipilersornerit
Alter Me & Angu
Soorlu amerlanerit nalunngikkaat Taseraliup inersuaa 256-inik issiaveqarpoq. Naak isersimasinnaasut nikkorfasut amerlanerulersinnaangaluartut issiaviit tulatsinnerisigut, nassuerutigisariaqarparput rock-imik tusarnaartitsinerit angisuut suli Timersortarfimmi ingerlanneqartuartariaqassammata. Rock-imik tusarnaartitsinerit inunnit 1000-it tungaannut peqataaffigineqarsinnaasut pikkunartumik pissarsiffiulluartarput aamma aningaasatigut imminnut napatissinnaanerusarlutik. Tamanna Sisimiunuinnaq atuutinngilaq, illoqarfinnulli allanut tamanut, soorlu assersuutigalugu Nuummi tusarnaartitsinersuit Inussivimmi akuttunngitsumik ingerlanneqartartut. Tamannali oqaatigereerlugu aamma taarusupparput Timersortarfimmi tusarnaartitsisarnernik Taseralik pitsanngorsaaqataasinnaammat, aamma allaffissornikkut pilerisaarinikkullu eqaannerusumik periarfissiussisinnaalluni. Taamaattumik Taseralik aamma Sisimiut Tusaataat isumaqatigiissuteqarput siunissami annertuunik tusarnaartitsisoqassatillugu suleqatigiinnissaminnik. Tamannalu Timersortarfik klub-illu atuisartut qanimut suleqatigalugit ingerlanneqartassaaq.
Tusarnaartitsinissaq siulleq suleqatigiissutissarput Timersortarfimmi ingerlanneqartussaq 31. oktober pissaaq, nipilersortoralugit Alter Me aamma Angu Motzfeldt. Angu immikkut annertunerusumik ilisaritittariaqarunanngilaq, ukiuni kingullerni nunatsinni Danmarkimilu tusaamaneqarlualersimangami.
Nipilersoqatigiit Alter Me cd-mik saqqummersitseqqaarnermik kingorna rockimik nipilersortarfinni tamani nuannarineqaqalutik tusarnaartitsisalersimapput, kingullermik Aasiaat Rockfestivalimi. Nipilersoqatigiit pillugit siulittuutaavoq nunarsuatsinni tusaamasarsuanngoriaannaasut, tusagartuullu oqatigaat nuusiortarfissuarmik EMI-mik ( The Beatles-it nuusioqqaarfigisaannik) isumaqatigiissuteqarlersut. Pissanganassaqaaq.
Nipilersoqatigiit taakku marluk Timersortarfimmi tusarnaarneqarsinnaapput 31. oktober, tamakkuninngalu nuannarisallit ulloq taanna ullorsiutiminni krydsilereersinnaavaat. Bilitsi 185,- kr. siumoortumik pisinermi, isilernermilu 200,- kr. Isissutissat Taseralimmi tuniniarneqarput.
Meeqqanut - Anda Uldum & Jan Hilmar
Meeqqat minnerit puigorneqassanngillat.
Novemberip 4-ni aamma 5-ani meeqqerivimmiut atuartullu minnerit ukioq manna meeqqanut tusarnaartitsinerit nuannernersaannut qilanaalereersinnaapput. Tamanna pissaaq Sisimiut Kommuniata Atlantic Music-illu aaqqissuussaannik “Meeqqanut” tusarnaartitsineq Taseralimmi ingerlanneqalerpat. Tusarnaartitsissapput Anda Uldum aamma Jan Hilmar.
Nipilersornissat uterfigeqqissavavut nittartakkatsigut.
- Oqallinneq Taseralimmi
Namminersorneq pillugu paasisitsiniaaneq oqallinnissarlu, novemberimi taasisitsissutigineqartussaq sioqqullugu, paasisitsiniaanerit ingerlanneqarput. Paasisitsiniaaneq Sisimiuni ingerlanneqassaaq ulluni sapaat 26. aamma ataasinngorneq 27. november.
Margrethe Nielsen “Ilaqutariinnut”
Tamannali sioqqullugu Margrethe Nielsen “ilaqutariinnut peqqissaaneq suua”-mik qulequtsiilluni oqalugiassaaq pingasunngornemi 8. oktober unnukkut, nal. 19.30.
Aggialluarisi.
- Taseralimmi Bio
Pisarnertut Taseralik Bio filminik nuannersorpassuarnik pissanganartunillu oktoberip ingerlanerani takutitaqartassaaq. Sapaatip akunnerani 41-imi ”The Forbidden Kingdom” isiginnaarneqarsinnaavoq. Allat aamma takkutissapput, soorlu Rejsen til Saturn, Disco Ormene, Wanted, Hellboy 2, The Love Guru, allarpassuillu.
Eqqaamallugu filmernissat piffissaat ullut 18.-19. oktober Malugisarparaqartussaammat allanngortilaaratsigit.
Tamakkua tamaasa malinnaaffigisinnaavatit nittartakkatsinni www.taseralik.gl –imi.
Nuannisarluarisi
Juaaka Lyberth
Pisortaq