Novemberimi Taseralimmit
nutaarsiassat
Oktoberi pisimasoqarfioqisoq Taseralimmi naalluataavipparput. Asanninnilersaarut erinarsornertalik Gi mi tiggum, Silamiunit isiginnaagassiaq takutikkatsigu 31. oktober, Taseralimmi. Ulloq taannartaaq nipilersoqatigiit Angu aamma Alter Me illorsuarmi timersortarfimmi tusarnaartitsipput nuannarineqaqalutik.
Novemberimi pisussarpassuit
Anda Uldum & Jan Hilmar, tusarnaartitsinerit
Marlunngorneq aamma pingasunngorneq novemberip ulluisa 4-ni aamma 5-iani meeqqanut tusarnaartitsinerup ullorissavai. Taakku matoqqasumik aaqqissuussaapput meeraannarnik peqataaffigineqartussat. Sisimiut kommuniata aamma Atlantic Music-ip taakku aaqqissuussaraat.
Qasigiannguarmiut Sisimiunut
Isiginnaartitsisartoqatigiit Qasigiannguarmiut Josef Løvstrømimit siulersorneqartut Taseralimmi aliikkusersuissapput 8. aamma 9. november. Isiginnaartitsissutit ilaat pingasut ukuussapput: Sooq naasortalissavinga takusinnaanngisannik, Meerartaaqqaanniunneq kiisalu Assiliivik nutaaliaq atorlugu ersersaaneq.
Peqataasussat tassaapput: Andrea Rosback, Pilu Thorin, Makkannguaq Johansen, Parnuuna Brandt, Irena S. Thorning, Margrethe Sandgreen, Julie Løvstrøm, Augusta Hansen, Abel Smith, Josef Løvstrømilu. Isiginnaartitsinerillu akornisigut Magdaline aamma Arne Heilmann
nipilersortassapput. Suliniut taanna Tips & Lotto-mit tapiiffigineqarluni ingerlanneqarpoq. Aliikkusersuinerit pissapput 8. november nal. 19.30, aamma 9. november nal. 16.00. Iserneq meeqqanut 40,- kr. 60,- kr-inilu inersimasunut.
Nuannissaqaaq, aliikkusiarluarisi.
Saqqummersitsineq: Jonas Molbæk
Eqqumiitsuliortoq, qalipaasoq Jonas Molbæk, Sisimiuni najugaqartoq Taseralimmi saqqummersitsissaaq 14. novemberimiit.
Jonas Molbæk ilinniartitsisuuvoq, qalipaanermik imminut ilinniartissimasoq, arlalippassuariarlunilu Danmarkimi saqqummersitsisareersimavoq aamma illunik kusassaanernik suliaqartarsimalluni.
Qalipaanerup eqqumiitsuinik misileraasuuvoq, stencils aamma blindkontur atorlugu qaleriiaarilluni qalipaatinik akoorisarpoq titarnerillu ilisarnaatigai. Qalipakkamigut nunarsuatsinni pisunik eqqumiitsunik, ingasattajaartunik kusanartunullu oqaaseqaatitut ipput, nunarsuatta eqikkaluttuinnarnerata pilluaqqussutaanut perloqqussutaanullu, kulturikkullu akulerulluta aakkaluttuinnarnitsinnut. Nunarsuatsinni avatagiisitsinnut inuunermullu qinnagassarinnissutaapput. Jonas Molbæk, eqqumiitsulioqatigiinni Art Money-mi peqataasoq, sapaammi 16. november ualikkut nal. 16.00 qalipakkani oqaluttuarissavai.
Sisimiuni ullut kulturisiorfiit
Ingerlanneqassapput 15. aamma 16. november Taseralimmi. Aaqqissuisoralugit Sisimiut Kommunia, Taseralik aamma peqatigiiffiit kulturimik ingerlataqartut, aningaasaliisuuppullu Namminersornerullutik Oqartussat.
Ulluni marlunni pisussarpassuit immikkut tusagassiutinut nalunaarutigereerpavut, nittartakkatsinnilu takuneqarsinnaapput. Ulluni Taakkunani Taseralik tamarmi ataatsikkut atorneqassaaq. Immikkut meeqqanut aaqqissuusisoqarluni, ilaquta-riinnut inersimasunullu, kiisalu utoqqaat innarluutillillu puigorneqassanngillat.
Iserneq akeqassanngilaq, inissarli killeqartarmat bilitsinik Taseralimmut aallersoqarsinnaassaaq, program saqqummeriarpat.
Michala Petri aamma Lars Hannibal
Blokfløjte aamma spansk guitar atorlugit erinniarsuarnik nipilersortartutut nunarsuatsinni tusaamaneqarluartut Michala Petri aamma Lars Hannibal Taseralimmi tusarnaartitsissapput novemberip ulluisa 20-anni, unnukkut nalunaaqutaq 20.00. Iserneq 60,- kroniinnaqarpoq. Eqqaamallugu tusarnaartitsineq inersimasunuinnaammat, meeraaqqanik peqateqarnissaq pinaveersaartariaqarluni. Petri Hannibalilu pillugit ima oqartoqarsinnaavoq: Erinnat nipilersukkatik atorlugit nipilersortartut taakku marluk inerilluinnarsimapput teknikkikkullu pikkorilluinnassuseq angusimallugu, qularnaatsumik tusarnaartumut misigisaq pikkunarnerulersillugu. Tusarnaartitik tiguartarpaat misigitillugit tusarnaartitsinerup imaannaanngissusaanik immikkuullarissusaanillu, noqartit uummammiittut tamaasa attorlugit. Nipilersornermut nipilersuutinullu ataqqinninnertik atorlugu, Michala Petrip aamma Lars Hannibal-ip tusarnaartitik qasuernartumik tunisarpaat, nipilersornerup anersaavata iternganit pisumit.
Petri Hannibal-ilu pillugit annertunerusumik paasisaqarsinnaavutit nittartakkatsinni www.taseralik.gl –imi. Iserneq 60,- kr.
Inuusanik isiginnaartitsineq
”Niviarsiaqqap aallarnera”, taama ateqarpoq 26. november meeqqanut minnernut isiginnaartitsissutissaq isiginnaartitsisartoqatigiit Teatret Lampe-p takutitassaa.
”Niviarsiaqqap aallarnera” oqaluttualiaavoq nutaaliaq ilaqutariinnut meerartalinnut tulluuttoq. Oqaluttuarineqarpoq niviarsiaraq taalliortoorusuttoq, taamaattumillu ilaquttani angerlarsimaffinilu qimallugit aallartariaqartoq. Ingerlaarnermini naapittarpai inuit eqqumiitsorpassuit tarnigillu anersaakkut pusuunngortitsisartut. Silarsuaq oqaatsinik pinnguarnermik angakkuarnermik taalliornermillu ulikkaartoq aqqutissaavoq, immaqalu imminut nassaariniarnermi tassa aqqutissaq.
Nikoline Werdelin isiginnaagassiortuuvoq, isiginnaartitsinerlu inuusanik alutornartunik isiginnaartitsisunik erinnanillu nuannersunittaaq ulikkaarpoq.
Isiginnaagassiaq ilaqutariinnut 6-nit 11-nut ukiulinnut tulluarsagaavoq.
Iserneq meeqqanut 20,- kr. inersimasunut 40,-kr. Teatret Lampe Katuarlu peqatigalugit aaqqissuussaavoq.
Juulleriartuaaq Cafè Taseralimmi
Novemberi imaasereermat juulli qanilliartuaaq. Café Taseraliup oktoberimi iluatsilluartumik ingerlatani tallimanngornikkut frokostbuffet naammatsivilluni neriffigineqarsinnaasoq novemberimissaaq ingerlatsissavaa, kr. 65,- 11.30-13.30-imut. Kiisalu maana neqeroorutaavoq 28. november, unnukkut julefrokostertitsinissaq. Nerisassat mamartut, nipilersukkallu nuannersut ilimagineqarsinnaapput. Ikinngutigiit suleqatigiilluunniit inissamik inniminniilereersinnaapput. Unnuk taanna Ivinnguaq Band nipilersussapput, peqataassalluni Henrik Dahl.
Peqataaneq 225,- kr-niinnaqarpoq.
Filmigassat
Novemberimi filmigassanik neqeroorutissaqaqaagut. Silap qinnagasaarinera peqqutaalluni Hellboy 2: The Golden Army angumeqqutinngitsoorpoq. Taamaattumik takutissavarput 4., 5., 6. november unnukkut 21.00.
Ulluni taakkunanissaaq The Love Guru takutissallugutigu nal. 19.00.
Weekendi aliikkusersuinernut allanut atorsinnarlutigu 11., 12., 13. november takutissavarput Max Payne, nal. 19.00
Taseralimmi filmigassat allat www.taseralik, imaluunniit Sivdlek-mi sapaatit akunnikkaartumik malinnaaffigisinnaavatit.
Nuannisarluarnissassinnik kissaallusi
Juaaka Lyberth
Taseraliup pisortaa.