Louise Fontain Taseralimmi saqqummersitsissaaq
Eqqumiitsuliortoq Louise Fontain-ip Taseralimmi saqqummersitsinissaa ammarneqarsaaq
5. september, nal. 17.00. Saqqummersitassai qulequtaqarput "Qanilaakkat puisinnguuvoq".
Saqqummersitat oqallisissiaapput eqqarsalersitsisuullutillu.
Loiuse Fontain oqarpoq qulingiluanik ukioqarluni kalaallit nunaat qimassimallugu, meerarsianngorluni. “Danmarkimut nuukkamali alliartorninni eqqarsaatigisimanngilara Kalaallit Nunaanni inuiaqatigiit aaqqissuussaaneranni angut imaani piniartoq qiteralugu inuiaqatigiit aaqqissuussaasut.Aatsaat inesimasunngoreerlunga soorlu paasileriga. Piniartoq puisinnguamik pisaqartartillugu ilaqutariit pissaqartuaannartarput. 1960-ikkunnili suliffissuaqarnermut ikaarsaartoqarmat angutip piniartup inissisimanera allanngorluinnarpoq.
Maanna Kalaallit Nunaanni pilersut aatsitassarsiornermut ikaarsaalernermi ´60-ikkunni pisimasunut eqqaanarput. Angut aalisartunngorsimasoq maanna aatsitassarsiorfimmi sulisoriniarneqalerpoq.
Maanna Norgemi najugaqarpunga ajornartorsiullu Norgemi ersarissigaluttuinnartoq, tassa angutit aalisartut uuliasiornermi suliffissuaqarnermut ikaarsaartinneqarnerat. Pisussat qanoq kinguneqarumaarneri inernilereersinnaanngilakka, kinaassuseqarnermulli attuumapput, aamma 1960-kkunni nutarterinerujussuarmut eqqaanartortaqaqalutik”, oqarpoq Louise Fontain.
7. september nal. 16.00 Louse Fontain-ip saqqummersitani pillugit oqalugiassaaq.
Saqqummersitsineq ”Qanilaarnerit puisinnguuvoq” 28. September ilanngullugu Taseralimmi takuneqarsinnaassaaq.