KODA-p nersornaatai nuannaarutigineqaqaat
Sisimiuni Timersortarfiup qaliarsua arlaleriarluni qangattangajassaavoq tusarnaariat 1200-it amerlanerusut nuannaangaarmata ippassaq unnukkut Koda-p 2008-mut nersornaatai Sisimiuni agguaanneqarmata. Nersornaasiineq nal. 20.00 aallartiinnartorli tusarnaartitsinissaarsuup naanissaanut, nal. 02.00 tungaanut, tusarnaariat nuannisarnerat naliitsuuvoq. Qularutissaanngilluinnarporlu nersornaaserneqartut assigiinngitsuni pingasuni, tamarmik immikkut 20.000 kr-inik nersornaaserneqartut tusarnaarianit iluarisimaarluinnaraat, immikkut nersornaaserneqartoq ilanngullugu.
2008-mut nersornaatisivoq Herluf Møller, nipilersoqatigiinnit HEJ-ikkunneersoq, cd-liaanni Ukiuq-mut.
Isumalluarnartunut nersornaat 2008 tunniunneqarpoq rappertartunut Jospal G Feat. Don Maliko.
Ataqqinaammik nersornaat 2008 tunniunneqarpoq Ole Kristiansen-imut.
"Qangarsuanngorpoq inuit taama amerlatingalutillu nuannaartigisut peqataaffigisaannik maani taamatut aaqqissuussisoqarmat. Unnuk torrassuuvoq", taama oqarpoq Sisimiuni tusarnaartitsinernik aaqqissuussisartutoqqat ilaat, unnuaq marlunngulersoq tusarnaartitsinerup naammssilernerani.
KODA-p 2008-mut nersornaataa - Herluf Møller HEJ-meersoq
Herluf Møller nipilersoqatigiinni HEJ-meersup nunatsinni erinarsuutit nunaanerineqarnerpaat ilaat suliarisimavai, soorlu "ukiut", "kalaallit nunarput" aamma "aalakoorputit". Herluf Møller nipilersoqataalu ukiorpaalussuarni nipilersoqatigiittareerlutik 2008 cd-liartik siulleq saqqummersippaat. Suliaat siulliit cassettebåndini oqaluttartulluunniit nuutitoqaanni taamaallat pissarsiarineqarsinnaasut 1970-ikkunnisarpalaartumik nipilersoriaasillit nutaamik nipeqartilluigt saqqummiussuunneqarput. Maaqaasineqartarsimaqisoq torrallataat "ukioq" cd-liaanni tusarneqarsinnaavortaaq. Erinarsuut taanna nuannarineqartorujussuuvoq nipimigullu erinnanut nutaanut naleqquttorujussuulluni. CD-mik saqqummersitsinermigut Herluf Møller erinnarsuusiortartutut uteqqippoq, nuanneqaarlu HEJ tusarfigeqqillugit, ukioq taanna aamma tusarnaartitseqqittalersut. Saqqummersitaat Ukioq Nuunoq Studio-mi 2008 immiussaavoq.
Isumallunarnartunut nersornaat 2008 - Jospal-G Feat Don Maliko
Jospal-G Feat Don Maliko-kkut inuusuttunnguugaluarlutik taamaattoq sapinngillat nammineerlutik immiussinissaminnut. Nammineq rap-mik nipilersuusiorlutillu erinarsuusiorlutillu taalliortuupput. Nipilersuusiat, taalliat erinniallu ullumikkumut naleqqulluartut, meeqqanit inuusuttuaqqanit aammalumi inersimasunit tusarnaassallugit nuannarineqarluartut. Taallat meeqqat inuusuttuaqqallu ulluinnarni silarsuaannut tunngasut, ilisarisinnaasaat kinaassusersiorfigisinnaassaallu - misigissutsit misigisat atukkat nuannersut nuanniitsullu. Oqariartaatsit taallioriaaseq nalinginnaanngitsoq tusaqqoornartorlu atorlugu oqariartuutiminnik saqqumiipput: Meeravugut inuusuttuaraavugut oqimaatsunik attornartunik nuanniitsunik aqqusaagassaqaraluarluta taamaattoq nammineq sapinngilagut makeqqissinnaavugut, siunissarput qaamavoq.
Ataqqinaammik nersorrnaat 2008 - Ole Kristiansen
Ole Kristiansen-ip nipilersoriaasia immini nammineq pigisaminik silarsuaavoq erinnatigut taalliatigullu. 1980-ikkunnili Ole Kristiansen erinarsukkanik pissanganarluinnartunik soorlu Nutaraq tullinnguupputit, Zoo Inuillu erinarsuutillu alutornartut allarpassuit Ole Kristiansen-ip nipilersornermi immini silarsuaqarnini ilisarnaatigilersimavaa, assiliallusooq assiliaanngitsullu atorlugit taalliamini oqariartuutini itinerusumik isummerlugit saqqummiussortaramigit. 1970-80-ikkunni erinnioriaatsimit taallioriaatsimilllu kalaallit rock popiannut politikkimillu imaqarnerusumut nalioqqiullugu Ole Kristiansen saqqummerani nutaarluinnarnik periuseqarpoq, nunatta killeqarfia qatangerlugu nunarsuatsinnik kaajallaasumik, allaat Australiap inoqqaavinut Aboriginalsinut annguttumik. Ole Kristiansen-ip taallioriaasiata erinnioriaassusiatalu pitsaassutsimigut qaffassissusia uuttorneqarsinnaavoq nunarput sinnerlugu nunani avannarlerni nipilersortartunut nersornaammut ataqqineqaqisumut Nordisk Musikprisimut nersornaaserneqarsinnaasutut siunnersuutigineqarami. Nipilersortartunngorusuttunut kinguaariinnut tullernernut Ole Kristiansen malilgassiuilluartut ilagaat, aammalu nuannarinnittaasaa qilanaarlutik cd-liassaa tulleq aamma tusarnaartitseqqinnissaa utaqqisarlugu..
Juaaka immikkut nersorneqarpoq
Nersornaaserneqartut tamarmik scene-mi nikkorfarrattut tusarnaarianit pattaanneqarlutik nersorneqarneruttulersut, Koda-meersup Erik Martens-ip mikorfoni tiguaa, tupaallatsitsilluinnarlunilu nersornaat suli ataaseq tunniullugu, Koda-p immikkorluinnaq ittumik nersornaataanik taasani.
"Koda aalajangersimavoq ukioq manna suli ataatsimik immikkut illuinnartumik nersornaasiiniarluni. Nersornaat taanna inummut kalaallit nunaanni erinniortunut, erinarsuusiortartunut nipilersortartunullu annertoorujussuarmik sutigut tamatigut sunniuteqartumut tunniuterusupparput", Erik Martens tunngavilersuivoq.Nammineq erinniortullunilu taalliortuuvoq, nipilersortartuullunilu. Marlussoriarluni ataqqinaammik nersornaammut siunnersuutigineqar-tarsimalluni. Nunat avannarliit nipilersornermut komitiiannut Nomus-imut kalaallit nunaat sinnerlugu ukiorpassuarni ilaasortaasimavoq. Siornatigut atorfigisimasamigut Nuummi kulturip illoorsuani pisortatut aamma maanna atorfigisamini Sisimiuni Kulturip illorsuani suliarisarsimasarpassuarmiigut annertuumik nipilersortarneq siuarsaaqataaffigisimavaa, atungarisaasigut periarfissatigullu, KNR-kuttaaq nipilersorneq sunneeqataaffigisimallugu. Taasassat amerlaqaat. Assersuutaalluarpoq unnuk manna Koda-p nersornaasiuttagai maani Sisimiuni pitsaalluinnartumik avatagiiseqarluta ingerlassinnaanreput. Taamaatumik Koda-p immikkortluinnaq nersornaataa siullermeerluni tunniunneqartoq Juaaka Lyberth-mut tunniuterusupparput", oqarpoq Erik Martens Koda-meersoq.
"Pakasarteqaanga aalaterneqaqalungalu, qujanarujussuaq. Piareersimanngivippunga, ataatsimilli erinarsorfigilaarsinnaavassi", Juaaka qujalluni oqarpoq cd-liaminit suli saqqumminngitsumik erinnamik ataatsimik atuilersinnani, tusarnaariat ataatsikkut ersaattaallutik nersornaaserneqartoq tusarusullugu kissaateqarneranni.
Super Nina
Sisimiut Timersortarfianni tusarnaariat nuannatereeqisut suli nuannaarneroqqilerput pikkorissunut nersornaaserneqartut JospalG, Feat Don Maliko aamma Ikiuna ( Olsens Kids.ineersoq) Nina-mut kissasaatitut apippasimaarmata. JospalG-ikkut naammassimmata tusarnaariat timersortarfissuarmi tattoqisaatiinnalersimasut ataatsikkoorlutik Nina qilanaareqalugu suaartarrapput illorsuaq akisuasuinnanngorlugu: "Nina,Nina, Nina", nunatsinni erinarsortartuni assortungassaanngitsumik nuannarineqarnerpaaq scene-mut qaqitinniarlugu. Tusarnaartitsersuataarporlumi Nina Kreutzmann Jørgensen. Minutsini 90-ini tulleriisiinnarlugit tusarnaartini nuannaangaartut tiguaqqavai,naggasiilluni arlaleriarluni appeqqittariaqartartuluni.
Aaqqissuusineq tamarmi iluatsilluaqaaq, Sisimiuni aaqqissuussisartutoqqat ilaata oqarneratuut:"qanganngarsuanngorpoq inuit taama amerlatingalutillu taamalu nuannaartigisut peqataaffigisaannik maani taamatut aaqqissuusisoqarmat. Torrassuuvoq".
Nersornaasiineq tusarnaartitsinerlu KODA-mut Taseralimmit aamma Sisimiut Tusaataannit aaqqissuunneqarpoq, Koda annertut aningaasaliisoralugu. Aningaasaleeqataapput Air Greenland aamma Pisiffik Sisimiut, Centrum Kioskilu.
KODA info 3.maj 2009