Sisimiormiut inuusuttaat assiliiviup isaanit takullugit. Taseralimmi saqqummersitsineq

Assilisamigut pissanganarluinnartutigut assiliisartup Inuuteq Storch-ip Sisimiuni inuusuttut susassaqartuaannarlutik ingerlarsortut oqaluttuariniarpai.
Saqqummersitsineq ammarneqassaaq tallimanngornermi decemberip 4-aanni unnukkut nal. 21.00, aliikkusersuinertalimmik aamma inuusuttunut disco-mik qititsitsinermik.
Inuuteq Storch 20-inik ukioqarpoq, Sisimiormiuuvoq HTX-imilu ukioq kingulleq ingerlallugu.
Inuutip soqutigisarivaa assiliineq aamma assilisaminik digitalteknik atorlugu allannguallatsitsisarneq. Assiliivinilu qungatsiminut nivingatillugu aneertoq takuneqakkajuttuuvoq. Sisimiuni inuusuttut akornanni inooqataavoq. Aneertarpoq, sikkilertarpoq, snowboard'ertarpoq ikinngutinilu susassaqaqatigiittarlutik. Tamanna Inuutip assilisaani takuneqarsinnaavoq, assilisaasalu Sisimiuni inuusuttut inuunerat, 2000-imi ukuit qulit siulliit naalillartut, takutippaat.
Naak Inuuteq eqqumiitsuliornermi ilinniagaqan-ngikkaluarluni assilisai uumassuseqarput aalassarissuseqarlutik, assilissami qalipaatit ilutsillu ataqatigiissuseqarlutik. Assilisamini Inuutip peqqissaarnera misigissuseqarneralu ersippoq, assit pinngortitamik snowboard-ertunilluunniit imaqarpata.
Assit qarasaasiaq atorlugu suliareqqitaagajupput, taamaakkaluartoli kinaassuseqarput assillu takutippaat inuusuttut piumassuseqartuusut nutaanillu pilersitserusussuseqartut. Tamannalu ulluinnarni isiginiarneqanngitsoorsinnaasarpoq.
Inuutip ilutsinut qalipaatinullu alapernaannera alutornarluinnarpoq nutaannguallannartuullunilu. Nuannaarutigaarput tanngassimaarutigalugulu inuusuttup taama piginnaasaqartigisup saqqummersitseqqaarnera Taseralimmi pissammat.
Saqqummersitsineq Namminersorlutik Oqartussanit tapiiffigineqarpoq

Paasisaqarnerorusukkuvit Arnajaraq Støvlbæk attavigisinnaavat.