COLD CLIMATE HVAC 2009 – Nunarsuaq tamakkerlugu peqataaffigineqartoq Sisimiuni
Ulluni 16 – 19 marts nunarsuaq tamakkerlugu peqataaffigineqartumik isumasioqatigiittoqassaaq qulequtaqartumik Cold Climate HVAC 2009. Tamanna Sisimiuni ingerlanneqassaaq, Kulturip Illorsuani Taseralimmi aamma Sanaartornermut Ilinniarfiup initaavini. Ataatsimeersuarnermi sammineqassapput ilusilersuisarnerit, atortut qanoq atorneqartarneri, silaannaap pissusai kiisalu nunarsuup ilaani issittumi inissianik sanaartortarneq, ingerlatsineq aserfallatsaaliuisarnerillu. Isumasioqatigiittarnerit taamaattut ukiut pingasukkaarlugit, nunarsuatsinni sumiiffinni qaasuitsup killeqarfiata (polarcirklen) qanittuani, ukioq mannalu tassa pissaaq Sisimiuni. Ataatsimeersuarnissami ilisimatuut, illussanik titartaasartut, ingeniørit, illuliortitsisartut, sanaartortartut (entreprenørit) allallu illuliornernut soqutigisallit 100-it missaat peqataassapput. Peqataasussat kangitsinnit Kina-miit kititsinnut Canadamit aggersuussapput.
Soorluttaaq Olumpiadeqarnerani illoqarfimmut Olympiadeqarfiusumut ataqqinaataasartoq, taamatuttaaq illoqarfimmut Cold Climate HVAC-p sumiiffissaanut toqqarneqartumut ataqqinaataasartorujussuuvoq. Immikkut annertuumik tulluusimaarnartuullunilu ataqqinaataavoq Cold Climate HVAC 2009 ingerlanneqarnissaa Kalaallit Nunaanni, Sisimiuniittussanngorlugu iluatsinneqarmat, Sisimiut qaaqqusisutut illoqarfiussalluni. Tamannalu tulluarluinnarpoq, tassa Sisimiut nunarsuatta ilaani issittumiippoq, qaasuitsup killeqarfiata eqqannguani, ataatsimeersuarnermi ilisimasat ilinniarsimasallu tungaasigut tapersersorneqarnissaminut periarfissarissaarluni Sisimiuni Sanaartornermut ilinniarfik, Danmarks Tekniske Universitet-imut attaveqartoq, aqqutigalugu. Periarfissarlu tamanna pitsaalluinnartuuvoq. Ataatsimeersuarnissap piareersarneqarnerani pingaartinneqarsimavortaaq peqataasut kalaallit nunaanni pinngortitarsuarmik kusanartumik takusaqarlutillu misigisaqarnissaat kulturikkullu pisussanik aaqqissuussiffigineqarnissaat.
Cold Climate HVAC siornatigut Finland-imi, Islandimi, Japan-ini,Norge-mi Ruslandimilu ingerlanneqartarsimavoq, tullianilu 2012-mi Canada-mi ingerlanneqassalluni.
Ataqqinartorsuaq Kunngissaq Frederik ataatsimeersuarnissamik illersuisuuvoq. Ajoraluartumilli ataatsimeersuarnerup ammarneqarnissaanut peqataasinnaanani nalunaarsimavoq, kisiannili ataatsimeersuartussat iluatitsilluarnissaanik angusaqarluarnissaannillu kissaassimallugit.
www.coldclimate2009.dk –mi annertunerusunik paasisaqartoqarsinnaavoq.
Bent Michael Nielsen
Aaqqissuusseqatigiinni siulittaasoq
Kulturikkut aaqqissuussinerni uku peqataassapput:
Sisimiuni kalattoortartut, supputaasartulerlutik
Sisimiut Teenage Dancers
Uaajeertartoq Bendo Schmidt
Erinarsortartoq Juaaka
Sisimiuni erinarsoqatigiit
Six Foot Stompers, Lone Josefsen aamma Pele Møller