Akisuanerit festival aallartilluarput
Ippassaq unnukkut 2.oktober, Sisimiut timersortarfianni Akisuanerit festival siullermeerlunit tusarnaartitsissutigineqarmat ilisarnaatigaat nipilersukkat nuannersut, inuillu nuannaartut, unnullu naammat inuppassuarneq peqataaffigineqarpoq. Tusarnaartitsinerit aallarnerlugit Sisimiormiut "No Name" kissassaasutut aallartipput nal. 21.00, malitsigalugit Miki Thomsen Band aamma Kimmernaq, Disco Bay Bluesinik ingiorneqartoq. Unnummilu aqqit tusaamasaanerit appilerneranni unnuap qeqqata missaani Sisimiut timersortarfiat 8-900 -it missaannik tusarnaariaqalereersimavoq. Miki Thomsen Sisimiuni nipilersortartutut siulermeerluni appasimaarpoq,naak isiginnaartitsisartuttaaq ilisarisimaneqaraluarluni. Qularnanngilaq Miki erinarsortartutut aliikusersuisartutullu siunissaqarluartoq. Mikip inuusuttut tusarnaarluartilaavissorpai. Kimmernaq erinarsortartuuvoq pikkorissoq erinagissorlu scene-miinnissamut sungiussisimalluartoq. Pilu Lynge-ip erinarsugassiaanik atuisarnera assut kimittusarpoq nuannerlunilu, naak erinarsuutit taakku saqqummeqqaarnerannit ukiut arlalinngoraluartut. Disco Bay Blues, Kimmernamut nipilersortuusut kakkalluinnartuupput. Nukappissat taakku nipilersorneq suunersoq nalunngilluinnarpaat. Tusarnaartitsinerup nipaa qullilersorneralu ajunngilluinnarpoq. Isinut siutinullu nuannaartitseqalutik. Taamaattumik tusarnaariat kissatsilluarneqarsimapput Mariina kingornalu HEJ appisimaalermata. Malunnarluarpoq amerlasuut aggersimasut Mariina tusarnaariartorlugu, tamarmillu Mariinap erinarsortagaat alanngaartarpaallusooq. Mariinap tusarnaartini suli tiguarluarsinnaavai nuannaartillugillu, naak immaqa oqaluffiginerulaarsinnaangaluarlugit. HEJ-ittaaq nuannersumik aliikkusersuivoq. Ataatsimut isigalugu Akisuanerit Sisimiuni aallartinnerat iluatsilluartoq, naak erinarsuutip naggasiutip appinneqarnerani inuppassuit scene-mut qaqeqqarrakkaluartut.
Aamma Ilulissani Nuummilu aaqqissuussisut tusarnaartitsinernik iluatsilluartunik tusarliussaqarput. "Igalikormiut kiguaavi" Ilulissani Sermermiuni appisimaartut inersuarmi uliikkaartumi appisimaarsimapput. Igalikormiut unnugu Sisimiuniissapput, Nina Kreutzmann ippassaq Nuummiittoq unnugu Ilulissaniissalluni. Nuumilu ippassarnit 1200-missaaniittunit Akisuanernut peqataajartortuni suli amerlanerusunik aggernissaat ilimagineqarpoq.