2010 januarimi nutaarsiassat

Taseralimmik atuisartut suleqativullu tamaasa ukiortaami pilluaqquvakka.
 Qaammammoortumik nutaarsiassat uku uanga Taseralimmi pisortatut allakkama kinguller-saraat. 1. februar Arnajaraq Støvlbæk, maannamut aaqqissuussinernut pisortaasoq, Taseralimmi pisortanngussaaq. Arnajaraq aallaqqaataanilli Taseralimmi suleqataavoq, taamaattumillu Taseralimmi suleriaatsit ilisimaarilluarlugit. Illup oqaluttuassartaa nalunngilaa aamma siunissamut takorluu-gaqarluarpoq suliniutigerusutarpassua-qarlunilu, Taserallup siulersuisui aamma sulisui peqatigalugit piviusunngortinnia-ngassaminik. Taseralik Arnajararlu siunissamik pitsaasumik kissaallugit ukiuni 2½-imi maani sulisimaninnut nuannerluin-nartumut qujavunga. Pisortat paarlaannissaan- nut atatillugu ilasseqatigiisitsisoqassaaq tallimanngornermi 22. januar.
 Pisortalli paarlaannissaat kisimi januarimi pisussaanngilaq allarpassuaqarpormi.

Kirstine Kreutzmann saqqummersitsinera
Sisamanngornermi 21. januar nal. 16.30 Kirstine Kreutzmann-ip saqqummersitsinera ammarneqassaaq. 26-inik ukiulik Kirstine Kreutzmann qalipaasartuullunilu taalliortarpoq.

 Kirstine Kreutzmann Kangaamiuni inunngorpoq maannalu Sisimiuni najugaqarluni. Sunngiffimmini qalipaaneq soqutigisaraa aatsaavissuarlu nunatsinni saqqummersitsissalluni. Qalipagassianut akryl uuliamillu qalipaatit atorlugit qalipaasarpoq, pinngortitaq eqqarsaatinilu qalipaaneq atorlugu annittarlugit. Kirstinep qalipagai inunnut ataasiakkaanut immikkut isumaqarsinnaapput, taamatullu isummamut ataatsimut parnaarussimagatik.
 Juni 2009-imi Kalaallit Illuutaanni Københavnimiittumi allat peqatigalugit saqqummersitsivoq. Saqqummersitsineq
 atserneqarsimasoq "Hvad drømmer du Grønand" uani atuarneqarsinnaavoq.
 Nittartakkatsinni www.taseralik.gl Kirstinip qalipagaasa ilaat takuneqarsinnaapput.
 Kirstine Kreutzmann februarip aallaqqaataani Taseralimmi aaqqissuussinernut pisortanngussaaq Arnajaraq Støvlbæk taarserlugu. Erseqqissalaassavara Kirstine-p saqqummersitsinissaa siorna aasakkulli isumaqatigiissutaareersimammat atorfiligigas-saata inuttassarsiunneqarnera sioqquteru-jussuarlugu.
 Kirstine Kreutzmann-ip qalipagai 14. februarip tungaanut takusarneqarsinnaapput.

Ilasseqatigiinneq pisortat paarlaanneranni
 Tallimanngornermi 22. januar Taserallup siulersuisui ilasseqatigiisitsissapput pisortat paarlaannissaat iluatsillugu. Taserallup atuisartui, ikinngutai suleqataalu ' tikilluaq-qusilluni inuulluaqqusillunilu' ilasseqatigiin-nissamut qaaqqusaapput. Tamanna pissaaq nal. 15.30 - 17.00. Kikkulluunniimmi soqutiginnittut 'nutaamut kutaarsiartorlutik 'pisoqqamut' inuulluaqqusiartorsinnaapput. Kaffeqassaaq aamma immiartorfimmut viinnaattaamik sutortoqarsinnaassaaq.

Unnuk kulturisiorfik tilluuttartullu
 Nunatsinni illoqarfinni allarpassuarnisulli Sisimiuni unnuk kulturisiorfiussaaq arfininngorneq 23. januar. Illoqarfimmi suliffippassuit unnuk taanna ammassapput, Taseralimmi periarfissippavut peqatigiiffiit unnuk taanna imminnut ilisariterusuttut. Ukioq manna nutaatut taaneqarput 'Tilluuttartut' peqatigiiffittaavat, oqaatigine-qarporlu ilaasortat ilaat pisinnaasaminnik takutitsiumaartut.
 Unnuk kulturisiorfik nal. 19.00 ammarneqarpat innarluutillit inaanni najungaqartoq Hans Michael Johansen erinarsorluni aalliikusersuiniarpoq. Cafe Taserallup kalaalimernit kaffi, kaagillu sassaalliutigissavai. Unnummi kulturisior-fimmi Cafe 23.00 matussaaq.
 Innuttaasullu eqqissisimaarlutik unnussiorusuttut Taseralik Bio-mut filmeriakutsoorsinnaapput, unnuk taanna filmit assigiinngitsut marluk takutitassaam-mata.

Persuarsiorluni filmimik takutitseqqaarnissaq
Tallimanngornermi 29. januar nal. 20.00 Taseralik Bio persuarsiorluni assukker-suullugu Ujarneq Fleischerip filmiliaata aappa takuteqqaassavaa. Taanna ateqarpoq 'Akiniaaneq killeqaraangat'

Filmip imaraa nunatsinni pisiniarfissuit marluk akornanni sulisut 'sorsuunnerat' atortorissaarutit elektroniskiusut atorlugit:
 'Pisiffimmi Brugsenimilu sulisut akornanni aaqqiagiinngissut inunnik akeqqernermut saassimavoq. Siornami Brugseni aaqqiagiinngissummi ajorsarsimavoq akiniaanerlu annertusigaluttuinnarpoq.
 Dan Sarfannguanit Sisimiunut nuuppoq, kammanilu Pisiffimmi suleqatigilerlugit. Siivap, Brugsenimi sulisup, tamanna paasivaa akiniaanialerlunilu. USB-mi paaraa, tassaniippullu aaqqiagiinngissutinut kingullernut uppernarsaatit.
 Politiinut tunniunneqannginnissani siunertaralugu, Dan-ip USB tiguniarlugu Brugsenip allaffianut iserniarsaraaq. Tamannali ajutoorpoq Dan-ilu politiinit tigusaavoq. Aniguisinniarlugu kammaasa namminersornerullutik oqartussat qarasaasiaqarfiat hackerpaat (iserfigaat) Dan-ilu allamik kinaassusilerlugu.
 Pisiffiup ittuata Îsâp eqqartuussissuserisoq Assaqutami najugaqartoq imerajuttuusorlu ilisarisimavaa. Taassumalu kisimi inatsisaatsuliornermigut Dan ikiorsinnaavaa.
 Eqqartuussivilli avaqqunniarlugu Siivap Brugsenimeersup Dan-i ikinngutaalu unammillerpai. Pisiffik ajugaappat Dan-ip USB tigussavaa, imaalu tamarmik peerneqassapput. Brugseni ajugaappat, Dan-i ikinngutaalu politiinut tunniunneqassapput, taamaalillunilu Dan-ip politiinngorusulluni takorluugai aserussallutik'.
 Ujarneq Fleischer nunatsinni tamarmi ilisarisimaneqalerpoq filmiliani "Tikeq, Qiterleq,Mikileraq Eqeqqoq' Taseralimmi takuteqqaaramiuk, kingorna filmertarfinni allani takutinneqarluni.
 Tallimanngornermi 29. januar persuar-siornartumik filmimik takutitseqqaarnissaaq, persuarsiorluni takutitseqqaartarnerit allat ileqqui tamaasa atorlugit ingerlanneqassaaq. Natsersuaq aappalaartoq Taserallup isaariaata sioraanut siaarneqassaaq, qaaqqusallu assuffattut champagniamik pussullugillu tamussiussassanik sassaalliiffigineqassapput. Ujarneq & Co.-llu takutitseqqaarnissami peqataasut, aningaasaliisut, ilaquttat allallu ikiuuttut qaaqquvaat, filmertarfimmilu inissat sinneri persuarsiorluni takutitseqqaarnissamut akiusumik 120,- kr-lerlugit tuniniarne-qassapput.
 Takutitseqqaarnissamut atatillugu nipilersoqatigiit Torluut qaaqquneqarput nipilersortussatut.
 'Akiniaaneq killeqaraangat' naliginnaasumik tamanut takuteqqaarneqassaaq arfininngor-nermi 30. januar- Tassani Ujarneq Fleischer aallarniilluni oqaaseqartussaavoq.
 Aamma filmi isiginnaariarneqarsinnaavoq 31, januar, kiisalu 2 aamma 3. februar.
 Malugisiuk isernissamut akit assigiinngim-mata, apeqqutaalluni gallapremieriunersoq, premiariinnaanersoq takutinneqaannarnersor-luunniit.

Torluut tusarnaartitsissaaq
'Akisisuaneq killeqaraangat'-ngap takuteq- qaarneqarnera naggaserlugu nipilersoqatigiit Torluut erinnanik marlussunnik atuissapput.
 Takutitseqqaarnermilu peqataasut Taseralim-mi paarlersuarnut ininullu ataatsimiittarfinnut imeruersaaseriartorneranni inersuaq nipilersorfissanngorlugu aaqqinneqasaaq, tassani nunatsinni rockimik nipilersortartut maannakkorpiaq alutorineqarnerpaat tusarnaartitsissammata.
 Torluut nunatsinni tusaamasaallualerpoq Nuummi Dr. Hook tusarnaartitsimmata. Aamma Torluutsikkut ilisimaneqarput tusarnaartitsilernerminni alutornartunik atisalersortarnermikkut.
 Torluutip inuttarai uku: Hans Ole Amossen, Tina Rebecca Holm, Nathan Kreutzmann, Ove Mørch, Kasper Mathiesen, Mike Fencker Thomsen, Nuka Alice Lund, Malik Brøns, Aqqalu Berthelsen.
 Torluut tusarnaartitsissaaq Taseralimmi tallimanngornermi 29. januar, nal. 23.00 - 02.00-imut. Iserneq 100,- kroneqassaaq.
 Aaqqissuussineq taama angitigisoq iluatsissinnaanngilaq Taserallup Ujarnerullu aningaasaliisartui ikiorsiinngippata. Qujanaqaallumi. Tips- Lotto-p saniatigut aamma Air Greenland, Pisiffik, Qeqqata Kommunia. Centrum Kioske, Taseralillu aningaasaleeqataapput. Unnuk Taserallup Ujarnerullu peqatigiillutik aaqqissuuppaat.

Cafe filmertarfillu
Januarip qaammataa filmertarfimmut Cafe-mullu - manna tikillugu - ajunngivissumik ingerlavoq. Filmeriartut sutoriartullu amerlaqaat. Filmit Avataq aamma 'Innariup sinnattui' nuannarineqaqalutik isiginnaariar-neqarput, soorlulittaaq filmit allat aamma orningarneqaqisut. Sila qaammariartulernera aamma malunnarsivoq ' nalunnguarfiup tasia' aqqusaarlugu silaannarissariat seqinermik apummillu nutaami alutorsartut Cafe-mut sutoriartortarneq ingerlalluarmassuk.
Friture uulia atornagu allanik sassaalliu-teqartarneq aamma nuannarineqaleriar- tuinnarpoq, pitsanngorsaanerlu ingerlattuar- neqassaaq.
Taserallup nittartagaani www.taseralik.gl -mi filmigassat suuneri malinnaaffigisinnaavatit, soorlulittaaq kulturikkut aaqqissuussat aamma allaaserineqartartut.

Qujanaq
Naggasiutiinnassavara qujanissara. Inuppassuarnut Taserallup aallartisarnerani ikiuullutillu kajumissaajuarsimasunut qujanarsuaq. Ukiut 2½-it qaangiuttut assorujussuaq nuannerput. Taseralimmi sulisunut aamma siulersuisunut qujanaq. Kiisalu Arnajaraq Støvlbæk atorfittavani pilluaqqullugu Taseralik ilanngullugu siunissami pitsaanerpaanik kissaappara.

Inussiarnersumik inuulluaqqusillunga
Juaaka Lyberth
Pisortaq
Taseralik, Sisimiut, 19.januar 2010