Taseralik
Siunertaa
Sisimiuni Kulturikkut illorsuarmit, Taseralimmit, Sisimiut Kommuneani kulturimut tunngasut uummarissarlugillu ineriartortissavai, tamatigoortumik iliuuseqartarnermigut, nammineerluni qilersorneqanngitsumillu nalilersuinermigut. Tamatumani kulturimut tunngasut ilungerlugit – fiilmertitsinerit, isiginnaartitsinerit, nipilersortitsinerit, saqqummersitsinerit, ataatsimiititsinerit, isumasioqatigiisitsinerit, peqatigiiffiit sammisaqartitsineri, pisortat aaqqissuussineri assigisaallu allat isumagineqartassallutik.
Kulturikkut illorsuup Sisimiut Kommuneani/Kitaata kommuunerujussuani eqqumiitsuliat kulturimullu tunngasut siammarsaatissavai innuttaasunullu nunani issittuni nunanilu avannarlerni eqqumiitsulioriaatsit kulturikkullu inooriaatsit siammarsaatissallugit, matuma siuliani eqqartorneqartut aqqutigalugit.
Aaqqissuussaanera
Taseralik 1. marts 2008 ammarpoq. Illorsuaq Qeqqata Kommiuniata pigaa suliffeqarfilli namminersorluni ingerlavoq - erhversdrivende fond. Taseralik tallimanik siulersuisoqarpoq, taakku UANI takuneqarsinnaapput.
Taseralimmi ataavartumik atorfillit sisamaapput, taakkulu saniatigut cafèmi, filmertarfimmi saaffiginnittarfimmilu sulisoqarluni. Atorfillit UANI takuneqarsinnaapput.
Ateqaataa
Kulturikkut illorsuup aqqa ammarneqalermat innuttaasunit unammissutigineqarsimavoq. Inuit pingasut "Taseralik" siunnersuutigisimavaat - ajugaassutigalugulu. Ajugaasut tassaapput Hans Lennert, Nikku Olsen kiisalu .
'Taseralik' tassaavoq nuna Sisimiut avannaatungaaniitoq. Qeqertaapput arlaliusut qangarsuaaniilli aasiviusimasut. Kujaatanit avannaanillu inuppassuit naapiffigisarsimavaat piliffigisarlugulu. Allaat inuit 500-t tungaanut katerittarsimanerat ilimagineqarpoq. Taseraliup eqqaa piniagassalissuusimavoq - aaveqarfiulluni nataarnaqarfissuullunilu. Taseralimmi kujataanit avannaanillu nutaarsiassat oqaluttuarineqartarsimapput aammalu aappassamik nassaarfiusarsimalluni. Inngerutit nutaat Taseralimmi pinngortarsimapput taamatuttaarlu oqaluttuanik paarlaasseqatigiiffiusimalluni. Taseralimmi qeqertat annersaat taaneqartarpoq Perulik, tuperpassuit peruinik ulikkaarmat - ujaqqat tupernik paarisut.
Taseralik ammarneqarmat Otto Rosing-ip atuakkiaata saqqummernera siulleq ilaqutariit Rosing-ikkunnit tunniunneqarpoq.
Kulturikkut illorsuaq naapiffiuvoq kulturimillu paarlaasseqatigiiffiulluni. Illoqarfimmut kulturimik pilersuisuuvoq ineriartortitseqataasuullunilu. Aamma tatsip eqqaani inissisimavoq, taamaattumik ateq Taseralik tulluarluinnartuuvoq.
Ilisarnaataa
Taseraliup aqqa saqqummiunneqareermat ilisarnaataa innuttaasunik unammissutigineqarpoq. Titartakkat qangatoortunik tupillit arlalippassuarnit siunnersuutigineqarput - nalunarani Taseraliup aasiviusimanera ilisimaneqarluartoq. Titartakkani ajugaatinneqarpoq Anna Lise Kreutzmann-ip titartagaa tupeq perulik. Isuma taanna atorlugu titartagaq grafikerimut suliariteqqinneqarpoq - suliarinnittuulluni NUISI Grafik.
Ilisarnaatip kalaallit pissusitoqaat ersersippaa - aasami katerisimaartarneq, pilisarneq pissutsinillu paarlaasseqatigiittarneq. Aammali ullutsinnut tulluartumik iluseqarpoq.
Tupeq aamma kulturimut sanilliunneqarsinnaavoq - kulturip ilaatigut tunngavigai: Nipilersorneq, erinarsorneq, isiginnaartitsineq, eqqumiitsuliorneq ileqqullu. Taamatuttaaq tupeq perunik oqimaaquteqanngikkuni atasinnaanngilaq.